Baru-baru ni, Awak solalu torpikir tontang konangan silam jaman budak-budak Maghin. Macam-macam yang kito buek main torghojah yo. Toringek balik maso disekolah ghorndah bilo Cikgu Bahaso Malaysia nghaja tontang poribahaso. Salah satu eih, "Dah torghantuk barghu tonghadah". Paham amek2 maksud eih bilo Cikgu "explained" (umang eih, cakap omputih pulak deh) tompi tak masuk kopalo..itulah deh kan. Bilo spesis behga Tu sampai bilo behga. Tak paham bahaso kato Orghang Nismilan. Konangan borbalik satu "insiden" (cakap omputih laie..ha,ha) maso budak-budak dulu. Rumah omak tompek Awak mombosar Tu ghumah Limeh bontuk Minang. Jadi ngumah banyak tiang2 Kek bawah ngumah. Jadi Kek bawah ghumah tu tanah yang tak borsimen. Arwah Apak Dan Omak dulu selalu susun Kayu papan lantai, Kayu borghuti dan kampit2 simen yang bolum pakai laie Kek bawah ngumah. Konon eih "for future house expansion" lah. Tompi sampai jo sudah tak borpakai. Sampai ghorput dan simen dah jadi kogheh cam batu dalam kampit Tu...ha,ha,ha. Awak pulak dah jadi kobiasaan kok nak poi dari side ko satu side ngumah tu, tak yah koliling ngumah do. Ikut shortcut yo, lalu bawah ngumah.
Maso kocik2 marghin, Awak ghordah yo, borlaghi Kek bawah ngumah tu. Solalu jugak main2 Kek bawah ngumah tu. Ado yo bondo nak buek kek bawah ngumah tu. Paling2 tidak bontang tikar mongkuang dan tidur. Siap bawak banta laie..Sojuk Der...Memang sosuailah tidur potang...Konkadang siap makan laie Kek bawah ngumah tu. Pokok eih jadi tompek lepaklah. Bayangkan umur barghu 6-7 tahun dah pandai carghi pot molepak. Agak sobab tu lah budayo molepak tompek sunyi, sojuk, terasing dah jadi sinonim dongan Awak. Yang pasti eih, budayo molepak sorghang2 ni monjadikan Awak ni sorghang "introvert", sampai sorkaghang. Mano tak, poie travel Overseas, sorghang-sorghang. Lepak Kek Air Torghojun, sorghang-sorghang. Lepak topi pantai sorghang-sorghang. Mandi tonghair sorghang-sorghang. Nunggu Dian Kek dusun, sorghang-sorghang. Makan pun sorghang-sorghang. Tak introvert ko namo eih Tu..Ha,ha. Jauh dah molalut ni.
Borbalik pasal pori bahaso tadi, Awak nak nyambung corghito. Maso kocik-kocik marghin lalu Kek bawah ngumah tu tak porlu nak nengok Ateh do. Confirm tak torghantuk kopalo Kek lantai ghumah. Kirgho *confident* yo lalu bawah ngumah tu. Ntah camano, satu harghi Tu awak borlaghi Kek bawah ngumah tu, kopalo torghantuk kek lantai ghumah. Sakit bukan main. Maklumlah, tongah borlaghi..*high velocity"..he,he,he..Maun tak bodontum kopalo dengan papan lantai ngumah. Maso tu barghu Awak monoghadah ko Ateh dongan ponuh porasaan musykil dan ponuh ghaso kosakitan. Sib baik tak pocah kopalo.
Maso Tu jugak Awak tortanyo, apa hal pulak buleh torghantuk ni. Teori portama, adokah berlaku pomondapan tanah yang mongakibatkan ngumah ni monughun? Hilang sikik nghaso sakit, Awak torghuih check satu persatu tiang ngumah. Tak ado pulak kosan-kosan pomondapan. Tak pueh hati laie, check pulak tompek Awak torghantuk tadi kok-kok papan lantai tu torbungkeh ko atau patah monyobakan papan lantai tu melentok kobawah monjadikan lantai ghorndah darghi biaso. Itu Teori Keduo. Tompi papan lantai tu elok yo borsusun gharpat. Jadi apohal pulak buleh torghantuk ni.
Lamo jugak momikirkan apo punco eih buleh torghantuk ni. Tak apolah, dah torghantuk nak buek camno kan. Awak pun masuk ngumah nak sapu Minyak Angin kek tompek sakit tu. Pogang tompek sakit tu, ado torghaso macam bongkak. Lalu Awak pun masuk nak nengok corghomin..nak pastikan bongkak tu bosar mano. Biasalah, jaman marghin, satu pintu lomarghi baju ado "built-in* corghomin bosar. Buleh kato an, tiga suku pintu lomarghi tu. Jadi kok bordighi dopan corghomin Tu, kirgho nampaklah satu badan sampai ko lutut.
Cek punyo cek, adolah bongkak Sikit, merghah-merghah. Biasolah kan, budak behga, kopalo mesti kopalo batu. Apo ado hal! Lagi pun Arwah Omak solalu cakap, "bortuah punyo budak, behga amek2". So I'm not wrong. Blame it on my Mom..Umang eih, omputih laie..ha,ha,ha.
Jeng, Jeng, Jeng...totibo Awak tengok badan Awak kek dalam corghomin macam ado yang tak kono! Pongamatan mondalam diperlukan seperti mana pengamatan mendalam tentang tiang ghumah Dan lantai ngumah tadi...Ha,ha,ha. Banyak sangat pengaruh Sherlock Holmes. Alek-alek Awak torpikir..Ontah-Ontah Awak mengalami pertumbuhan tubuh badan tak? Jadi tampo borlengah-longah lagi, Awak masuk balik bawah ngumah dan bordighi togak. Botullah, jarghak kopalo dongan lantai ado ruang muek2 satu jarghi torlunjuk yo. Musykil lagi. Bilo pulak Awak bortambah ketinggian ni. Konapo tak torghaso Tinggi? Tak ado *indication" pun. Satu potang memikirkan tontang tu. Jangan mombongaklah kalau kau Orghang umur 6-7 tahu pasal tumbesaran. Apo kau nak ngaku kau Albert Einstein?
Totibo jugak toringat Cikgu mongajar pori bahaso " Dah torghantuk, barghu torghadah". Pemahaman Awak bortambah tontang pori bahaso tu. Lain Kali, tengok2 dulu sobolum buek sesuatu. Dirghi Kito ni sesuai tak nak buek sesuatu. Ikut keadaan dirghi serta kemampuan dirghi. Jangan main torghojah yo. Jangan confident sombrono yo sampai torghantuk. Koadaan borubah. Jangan dek sombrono kito, akan datang sedikit kesakitan. Banyak ko Sikit ko sakit Tu, totap ado kosan. Buek eih kalau nak jadi corghito, lopeh torghantuk tu Awak ado darghah boku kek dalam kopalo, camno? Siapo susah? Confirm Arwah Omak.dan Apak Yang susah. Mulolah demand buah anggur, epal, plum bagai kalau dah kono duduk wad...kan, kan! Kau ingat anggur, epal, plum tu murghah jaman portongahan 70an dulu. Banyaklah duit Orghang tuo tu nak layan eikau yo. Sib baik, sampai dah ko tuo ni tak ado kosan sampingan. Tompi tak tahu lah dek sobab torghantuk tu, menjadi Awak lobih bhega. Allahualam. Memang behga pun sampai sorkaghang. Jadi posan Atuk, jangan dah torghantuk barghu nak torghadah. Paham dirghi sondhirghi, kolobihan dan kolomaham dirghi serta kosan eih. Tengok-tengok keadaan koliling. Kok nampak bondo tu baik yo, jangan copek porcayo. Kok nampak bondo burghuk Jangan copek monghukum. Cuba dongar *input* Orghang lain sikit. Jangan behga bonar dan jangan taksub. Jangan main torghojah yo. Paham dah tu kan. Apo-apo, rogerlah yo.
Signing off...Umang eih🤭
Blogspot: Dari Bongek Ke Brisbane.
No comments:
Post a Comment